23/1

مساكم ورد ..


طولت وايد؟


ولكن .. ييتكم وانه مليآنه ، وفايضه كلام وسوالف..
اتمنى مايخذلني التعبير عندكم, واتمنى بعد ماتخذلوني واشوف ارائكم بكل شي بتكلم عنه..

اليوم هو يوم , مادري يندرج تحت اي مسمى ؟ كنت اتوقعه بيكون يوم حلو ودافي .. الجو بآرد , وصايره اكره اني اطلع لأن البرد مايقصر , يبي الشاره ويدش في الضلوع..
عموماً ..التعب الجسدي يتقلص مرات , ولكن التعب النفسي مادري ليش اذا حسيت فيه .. دايماً يكبر .. و أخيس شعور احس اني مخنوقه!..
ومخنوقة "أيه" بس لحد يسأل من شنو! ..
لا تسألوني ,.. بس محرومه من حضن اللي احبه .. البرد يذبح ! .. والبعد يذبح .. والوحده تذبح .. والشعور يكبر .. ويكبر ..
من امس كان خاطري حد يلمني بقوه لين يعور ضلوعي .. بس مادري ليش ؟! موراضي يصير؟..
ألين حسيت ان خلاص.. مابي حد يلمني ..بلم نفسي بنفسي..




/


من شوي كنت اقلب افكاري  .. و آخر شي قصيت على نفسي بان الحياه حلوه ..
الحياه ورده .. وهذي اهيا لحظه حلوة وعشر يبطون الجبد!
واكتشفت بيني وبينكم اني اكثر وحده تقص على نفسها  واللي حواليها ..
والمشكله اقتنع باللي اقوله .. ان الحيآه حلوه ..
ويلا لازم نعيش : )


/


انه مستاءه ؟ فعلاً مستاءه!
انه محبطه .. شويه مابي اكابر..


من زمان عن هالشعور اللي احسه هاللحظه .. مابي ارجع لنقطة الصفر ..
احاول اسوي كنترول .. لأني مانجرف تحت أفكاري السيئه اللي تيي في بالي ..
لان رغم ان ماحس بشعور مؤسف تجاه نفسي..
 الا اني اشوف " نفسي " قاعده توصل لشي حلو من ناحية ثانيه..


/


ترى من سخافة القدر ! .. أن احنا نعكر مزاجنا دايماً ماتلاحظون؟
انه قررت يا .. سخافة القدر تروح ع صوب .. ولا انه اروح ع صوب..
مانبي نتلاقى .. ابداً ..
ترى والله مليت سخافات .. تخيلوا هالعيشه..
" سخافات القدر من صوب . وسخافات الناس من صوب "
بس شنقول " عيشة والسلام "

/

المهم بما أن هالهذره كلها عن نفسي..
ودي اسولف بموضوع .. بس مادري بالضبط ..
امممم " طريقة البحث عن السعادة " مثلا؟

/

اعتقد طريق السعاده يبدأ بالرضا ., كلن منا واجهته مشاكل بحياته .. ومرات تكون مشاكل نفسيه وازمات صعبه .,
بس أسهل طريقه للتغلب على هالشي , وتحويله بطريقة ايجابيه هو ناخذه ببساطه ونرضى بالمكتوب ,..
أعتقد لو كل انسان كان راضي على نفسه , بنكون كلنا بخير ..
انا الاقي نفسي ولله الحمد راضيه تماماً على مايحدث في علاقاتي ..,, وحياتي
سواء كان الشي سلبي او ايجابي ..
واقعياً هالشي يساعدني وايد .. ولكن ضرورة وجود الألم في بعض الأحيان شي " لا بد منه "

بالنسبه لمنظور بعض الاشخاص عن معنى السعاده..

مره كان الدكتور يسولف عن اكثر راتب في البحرين ...
وكان هو 83000 دينار .. شهرياٌ بدون علاوات , يعني الراتب الثابت ..
لمدير لبيت التمويل الكويتي..
فجأه .. كان يسولف شلون الانسان يكون نفسه من الصفر ..ويترقى .. ويوصل لشي ماكان يحلم فيه
وسأل واحد من اللي وياي بالكلاس!
لو كان هذا راتبك شبتسوي
طبعاً بكل بساطه قال راح افلها فل .. ولا بدرس ولا شي
قاله الاستاذ مع ابتسامه .. واذا افلست الشركه وطلعت منها ؟
قال عادي اهم شي استانس بحياتي " وكأنه مو مقتنع "

/

اعتقد ان السعادة ماكانت بحجم المال .. ولا نقدر نشتريها بفلوس اساساً
رغم ان الفلوس لها دور كبير في حياتنا .. تعتقدون منو ما يبي يعيش احسن عيشه؟
منو مايبي يسوق احسن سياره ..!
منو مايبي يلبس اكشخ الماركات واغلاهم .. منو مايبي قصور , وخدم ..
منو مايبي يسافر من بلد لبلد .. ويكون عالمه مريح..

* لكن من أكبر مشاكلنا .. نندفع للماده ونعتقد انها هي السعادة..

فيه رجال أعمال أميركيين ما غيروا
بيوتهم وباعوا ماضيهم يوم صار عندهم المليارات ويتبرعون من أموالهم للخير مع انهم
مو مسلمين اللي حتى الزكاة بعضهم
الله يهديهم ما يطلعونها صح ،
...- جوليا روبرتس الي تأخذ ملايين
على الفيلم الواحد ما عندها شغالة
تنام في البيت وهي اللي تربي اطفالها،

- الملكة إليزابيث تطفى لمبات
القصرعلشان ماتخسرحكومتها

*** هل سيأتي يوم ارى ان عقول البعض قد تنظفت واصبحت في رقي
/

حسب قراءتي ..لـمقال ..للـ د. صلاح صالح الراشد - رئيس مركز الراشد للتنمية الاجتماعية والنفسية بالكويت، والحاصل على ماجستير في الدراسات الإسلامية، ودكتوراه في علم النفس

السعادة لها اربع اعمدة..
- العقل  - الرغبة  - تحمل المسؤولية  - النبع الداخلي


- أن تنبع من رغبة أكيدة في تحقيقها، فالذي يريد السعادة سيحققها - إن شاء الله - بل سيمنحها للآخرين، فقمة السعادة أن يكون الإنسان قدوة لغيره مني البشر، وأن يكون عطاؤه للآخرين متصلاً ، ولو كان قليلاً ، وخير عطاء هو نشر السعادة أينما حل.
- أن يتعلم الإنسان السعادة وطرقها ومهارات اكتسابها.
- ألا يسقط الإنسان إحساسه بالتعاسة على الآخرين، بل يحدد مسئوليته عن هذا الإحساس.
- أن يكون الداخل منبعاً للسعادة، فغير السعيد داخليا لن تسعده أية مظاهر خارجية.


//


وآخر شي حبيت اكتبه لكم ..

- لسعادة دايمه ,/
أشرب حليب السعوديه مثلا " خخخخ "

لا صج ..

عشان تحس بسعادة :

- قدر ذاتك واعرف قدرك .. " واهدي لنفسك هديه بين كل فتره  خصوصا اذا كنت من الاشخاص اللي مشغولين طول اليوم"
- عزز علاقاتك بأهلك  - اصدقاءك..حبيبك
- مارس انشطه ترفيهيه ..
- اشتغل باعمال تطوعية .. في خدمة الناس ..
- حافظ على صحتك لان هذا اهم شي .. " ابداً مو شاطره بهذا الشي .. واعترف :( "
- مارس نظرية الاعتدال في أمور حياتك ..
- لاتهتم بكلام الناس الا في الشي المفيد ..
- كن ايجابياُ .. ولا تعتقد انك الوحيد اللي يعاني..
-واخيراً .. اهتم بامور الناس وعيش معاهم وادعمهم ..شاركهم امورهم .. بقلب مفتوح ونية صادقه

ونهاية هالبوست الطويل.. اتمنى لكم سعادة ابدية ..ورضا دايم...



مساء التفاؤل

مساء التفاءل

مساكم الله بالخير..

وأتمنى انكم بخير ..

وأتمنى بعد تستمتعون بهذا البوست ..

//

في البداية .. تغيرات جداً مميزه بداية هذي السنه ..

الحمدلله .. وضعي في تحسن مستمر " ربي لك الحمد "

رغم ان ليلة امس .. كانت ليلة فقد .. وأنا لا أحتمل الفقدان .. مادري فجأه قعدت اصيح يا ناس ..

فجأه مسكت مخدتي وخنقتني العبره .. وظلت الذاكره تخوني .. وتييب لي اشيا مادري من وين ..

الحلو .. رغم الجو الكئيب اللي كنت فيه البارحه ., الا ان الغريب تفكيري ما كان فيني ..

كنت اقلب وجوه بعض الاشخاص  الشابه .. اللي رحلو عن الدنيا " وكانو احبابهم " يعيشون فترة نفسيه تعيسه ..

الله يبعدنا عن الحزن والتعاسه..فعلا .. انه كنت افكر فيهم وأقول .. ياربي لاتحسسني باللي حسوه ..

بس احنا كثر مانكون بخير مقارنة بغيرنا .. كلما نحس ان الدنيا ضايقه فينا ولا نحمد ربنا ..

كثرو من الشكر لله سبحانه وتعالى .. وطلبو منه يعوضكم خير ..

//

اليوم .. يا على بالي موضوع , كنت افكر فيه وحبيت أشاركم وياي , عشان كلنا نقدر نوصل للشي اللي نبيه ..

وبما أنها مساحة " تخفيف عن الآلآم " و " حياة خفية " .. اعتقد ان البعض بيحتاج هالنقاط اللي بذكرها ..

كل شخص منا اكيد عنده نقاط  " قوه ، الضعف ، وبالمقابل عنده فرص , وعنده تهديدات "

وطبعا لمن نفكر بهالنقاط , نقدر نوصل لفكرة لتطوير أنفسنا..

مثلاُ ..

نقاط قوتي /

- أتحمل الضغوط , طموحه , عندي قدرة على فهم الامور بسرعه وتعلمها ..اجتماعيه

نقاط ضعفي /

- كتومه / متسرعه ..

الفرص اللي جدامي /

- فرصه عمل .

التهديدات /

- قلة الخبرة العملية ..

... خل اذكر بعض الاشيا اللي ممكن نقاشها او اطبقها على نفسي ...

طبعاً نقاط القوة . شي يميز الانسان، يعني انه مااحتاج اني اعالج شي , فنبتدي من ناحية نقاط ضعفي " مثلا كتومه " اعتقد الكتمان شي يأثر على الشخص .. قلباً وقالباً .. وانه بعطيكم مثال على نفسي ..

انه كتومه في أمور وايد مع اللي حواليني , ممكن حد يأذيني واعطيه طاف كبير قد برج ايفل ..ومن سخافة القدر ان في مره حصل لي موقف مع وحده .. كنت ماسكه نفسي عنها يمكن شهرين وهي كل يوم مسج وكل يوم اتصال .. وكل يوم صدمه .. وانه أبو الطاف مسويه لها .. مو لأني ماقدر أرد , بس مرات الرد ماراح يقلل من شي .. راح يزيد الشي ويخلي الكراهيه بين الشخصين تكون موجوده .. وللأسف وقتها كان كلش غلط , طبعا لان كان وقت عصيب في مرحلة شتات عاطفي ونفسي واحباطات من كل الجهات ..

وخصوصا اذا كان شخص غالي وما طلع منه الا كل خير .. بس نهاية الموضوع ياي يطلع حرته بأي طريقه ويقعد يتصرف تصرفات من ورآ قلبه .. نضطر ان احنا نصفه في قائمة الطاف .. ونتناسى تصرفاته عشان يبقى في قائمة اللي ينذكرون بالخير..

خل نروح للموقف نفسه ..

البنت الله يسلمكم من بعد هذا الطاف الكبير .. ياتني البيت وتهاوشنا .. هوشه كبيره لدرجة ان بيتنا كلهم وقفو عند باب غرفتي

ويبوني افتح الباب وانه فعلاً يا ناس كنت ما احس .. كنت في حالة هستيريه , حالة جداً صعبه  ..لدرجة اني فتحت الباب لأمي ..

وقلت لها يمه طلعو برآ كلكم مابي احد بالغرفه .. ابي اكون بروحي ..

وهني بدأت تطلع الدموع بغزارة حسيت اني ياهل صغيره .. كان الدم ينزف من شفايفي .. و مرت اخوي يات لمتني .. وقالت اهدي شوي! اذا ظليتي تصرخين بيصيدج انهيار عصبي .. وامي مسكت البنت وقامت تهديها ..

وطبعا الموضوع انتهى بشكل ودي ..

الزبدة اللي كنت ابي اوصلها لكم .. ان انه في يوم ماكنت اتوقع الكتمان راح يوصلني لي هالدرجه راح يخليني اتعب .. راح يخليني انفجر .. فأنه أتمنى انكم ماتغلطون مثل غلطتي ..

وانه بعد .. حاولت اني ابحث عن حلول لهالمشكله .. عشان اخفف على نفسي ..

بنيي حق نقطة ضعفي الثانيه ..

الا وهي " اني متسرعه "

هذي المشكله جداً صعبه ..واعتقد التسرع في الشي , ممكن يخليك تتخذ قرارات خاطئة وتسبب لك مشاكل..

لانه حلو الواحد يذوق كل شي حبه حبه .. وكأنك تأكل عنب .. يعني شوي شوي .. << صار خاطري هههههههه :$

فأنه طلبت من نفسي لنفسي اني أتأنى ..لأن في التأني السلامه ..

/

طبعاَ بتكلم من ناحية الفرص ..اللي بترتبط فيها التهديدات...

 ان الفرص تمر مر السحاب فاغتنموا الفرص

فرصة عمل .. قوية ، في مجال .. احتاج تقييم من جهة العمل , عشان يبدون موافقتهم او رفضهم..

يهددني شي واحد .. قلة الخبرة العملية ..من ناحية رسميه يعني اذا تتعامل مع شخص شي طبيعي يكون مختلف اذا مع شركه ..

اذا بشتغل لحسابي الشخصي .. شي طبيعي بتفرق اذا بحمل اسم شركة..

اذا بيشوف شغلي شخص واحد , شي طبيعي اذا بيقيمه شي فاهم او بيشوفونه على مستوى البحرين..

سو بصراحه  هالشي يهدد ثقتي بنفسي . ولكن هل معناه اني استسلم ؟

او اهون واقعد مكاني ؟ .. اكيد لا حاولت ابحث عن بعض الشغلات اللي ممكن تنفعني في مجال عملي .. وحاولت اني اكتسب بعض الخبره .. والرزق على الله...

يقول عالم من العلماء .. تعلمت القراءة و الكتابة وانا في سن الخمسين ..

هو عالم وقدر يتعلم على نهاية عمره ..

شي طبيعي كلنا نقدر نتعلم ونصحح اخطاءنا ونعزز ثقتنا بنفسنا

" ورحم الله أمرء عرف قدر نفسه "

//

في نهاية هذا البوست .. حبيت اقولكم مره ثانيه اجازة سعيدة ونومة هنيه..