فضفضة بين الدموع..

نـزفت..
حتى انتصر الدمع عليّ ..
ومادريت .. وش بقى ..
بس أقول..

الله عطـا / والله خذآ..
والله ( يـا عمري كريم *

//


هو بكــى حتى نآم..
وأنا غرقت وسط الدموع..
وكتمت كل الكـلام!..

تعرفوني! .. لا ..
لكن..
تجربة بين الضلوع..
حطت الحرقة في جفني ..والسلام!!..

/

نمت صح..
دمت ..لك.. وانا بسكـاتي أنوح..
وقلت لك مليون مره لاتشـك..
ماعلى المجروح يا عمري ( مـلام)..

..

أخاف أمـوت..أخاف أمـوت
أخـاف من كثـر الجروح..
تنسى لحظات الهيـام..

//

تكفى بس..
هو خذلني الجرح صح..
لكن انت لا تــروح..
ترى الغيـبة مصيـبة..
يستوي هالنـشبة ( قلبي )
يستوي والله حطـام..

،،..

روح نــام ..لاتفكر .. روح نـام..
بكره تعرف وش جرآلي ..
وكيـف حالي..
وكيف صابر عالليـالي..
جرحت , وقلت يالله ماعلينا ..
أنت غالـي..
روح نـام..

..

لا تردد
عيش تجرح ..,
وأنا ببكـي..

و على الدنيــا الســلام : )

تقبـلو نزفي .. ليس إلا ..

مزيد من صراعات الليل..

نص قلب ..

28/3

السلام عليكم ورحمة الله وبركاته ...

بعد التحيـة الحارة لكم ..

اقولكم اني مو بس مشحونه .. الا مشحونه ونص من كل شيء ..

وبحكم انقطاع النت عندي لفترة , ماقدرت ارجع لمدونتي ..

لاني ماحب ادون الا وانا عالاب .. لحد يقولي مسكي البيبي وجربي تكتبين ...

 لكن احنا نقول حصل خير ., وما صار شيء : )

أنا أتمنى فعلا أن اخباركم أحسن مني .. ومن كل قلبي اتمنى هالشيء ..

لان أخباري ماتسر وايد , ولكن الله يستاهل الحمد على كل حال ...

في هالواقع الغريب , عاشرت ناس وايد ... بس أنا أدري وقت الضيق ..

تعرف وجوه الناس الحقيقية .. وانا من قناعاتي الانسان مايحتاج للشخص اللي جدامه في وناسته ..

اذا ماكان له حضور في ضيقته ...

ولكن من قناعاتي اني مالبس اقنعه .. قلبي كبير مهما صار ويسامح

لكن مو كل مره بينسى..

لأن مهما يكون انا موملاك .. عشان اكون كامله..

الحب .. شيء / صار " مؤسف وغريب "

يؤسفني لين اسمع قصص فراق .. وناس حبو بعض فترة وعاشو احلى حب

يضيعونه على تفاهات ..

استغرب فعلا .. من اللي يعتقدون كل يوم بيلاقون لهم حبيب نفس ( الموديل )

شكليآ .. أخلاقيآ .. ومن كل النواحي ..

انا اعتقد اليوم اذا الانسان لقى له حبيب يستحق الحب ..

فلازم يمسكه لين آخر نفسه ومايخليه ..

يعني ...  يا تموت فيه .. أو تموت وتموته معاك : )   ...

لأن بكره ماراح تلاقي مثله

//

عندي مشكله تعبت اشرحها مدة شهر كامل ..

أنا ومذهبي ... مذهبي وانا ...

( مسلمة  - شيعية ) وبغض النظر عن بعض الاختلافات الصغيره مع المذهب ( السني )

الا ان صداقاتي واسعه و لي اشخاص من اهل السنه كأخواني وخواتي واهلي ..

لكن استغرب من العقول المتعصبه ..اللي تكبر المواضيع ..بأن الشيعي مختلف كليآ عن السني ..

وأن السني مسلم .. والشيعي " مادري شيطلع " 

ياناس .. هذي فتنة .. واللي مسويها يبي يضحك على خلق الله! ..

انا ليش اكره فئة عاشرتهم في كل مراحل حياتي!

ليش احقد عليهم ..! وأنا أكلت وشربت وياهم ..

وليش وليش وليش .. ووايد اسئلة ..

ترى في النهايه ..

الشيعي والسني يقرون قرءآن واحد ..

الشيعي والسني يصلون 5 صلوات ..

الشيعي والسني يصومون شهر رمضان ..

الشيعي والسني يعبدون الله وحده ..

الشيعي والسني ..مسلمين!

في اعتقادي .. الاختلاف مايعطينا الحق ان احنا نتجاوز على غيرنا ..

يعني عيب على اي شخص يسيء للآخر لان اهوا من المذهب الفلاني ...

وأنا أدري مية % ... اللي يسيء أهوا انسان جاهل للحين ماعرف شيء ..

وبصراحة كل واحد عنده عقل ويقدر يبرر تصرفات اللي جدامه ..

صح الظالم ما انكتب على جبينه ( ظالم ) ..

لكن تصرفاته .. تدل على ظلمه ..

في البحرين .. السعيدي! ..

حلل دم الشيعه! ..

وطبعا هو اتخذها فرصه

* لان اغلب الشيعه متضامنين في المعارضه الي تطالب بحقوق مشروعه ..

وشكله يحب يشرب دمنا ..

ومن السعيدي يطلع ! .. كما عرفت عن تاريخه هو شخص أساسا مجنس ..

وبحسب وجهة نظري .. هو شخص يدعي الأسلام؟! وهذا شي انا شفته بعيني يعني مومن وحي الخرافات..

- لأن فاز في الانتخابات ( لأن الحكومة تبيه ) .. وهذا بما معناه اعطي اصوات عشان يفوز لا غير

- لأن اهوا شخص كان له دور فعال في أثارة الطائفية والفتنه

- والسبب الأخير .. انا على خبري المتدينين .. وشيوخ الدين .. تكون عندهم صدق و أمانه ..

عشان يقدرون يكونون قدوة للناس..

لازم يكونون صالحين ..

لكن الآخ الـ " منجس "  ماهو الا حثالة .. كما أرى من تصرفاته..

لان لايملك رقي في التعامل ..ولاثقافة اخلاقية ..

و هو ورقة تقلبها الحكومة متى ارادت ...

يعني لو قالوله صلاة الصبح صلها أربع ركعات

بيقول / حاضر سيدي ممنونك ..

بس لاتنسون خلف الكواليس " بيقول لهم .. جم تدفعون !! "

//

من هذا كله ابي اوصل نقطة..

مذهبنا مكتوب علينا قبل لا نولد ..

عاداتنا وتقاليدنا لازم نحافظ عليها لكن نحافظ على الشي الطاهر , مو المدنس ..

يعني بعض العوائل المتشددة تحذر عيالها .. بأن الشيعه يقتلون السنه وخصوصا محرم! والعكس بعد .. بعض الشيعه تقول لعيالها السنه يكرهونكم ويحللون دمكم..

وتكبر العيال ويظل هالشي مغروس ..وهالشي كذا شخص جريب مني خبرني عنه ان سمع او مرت عليه هالأفكار

وطبعاً العتب مو على العيال .. على العوائل الغبيه ..

يا ناس أصحو .. ماراح تكون الدنيا بخير لو كل منا حقد على الثاني..

الانسان عنده عقله يحكمه في كل شي حتى في الدين ..

مو كل شي يقوولونه الشيوخ والمفتيين لازم اسويه ..

لان في النهاية الشخص محاسب على عمله مو على اعمال غيره ..

يظل مذهبي .. وسام افتخر فيه ..

وتربيتي اظل اشكر ربي عليها ..

لان مافي يوم من الايام حملت حقد في قلبي ..

ولا يوم من الايام تصرفت بجهل لمغثة الناس ..

** ترى الآدمي اذا قال كلمة حق .. فهي لنفسه ...لان محد بياخذ جزاها غيره اهوه..

تقبلو تحياتي

* مجرد " نص قلب " ..

N9.GLB@HOTMAI.COM

آخر الليل .. وأفكاري..

من كثرهم مرتآب / مدري منين أبدآ

هذي وجيـه أصحاب ، ولا وجيـه أعداء!

/

أطيبهم الكذاب وأصدقهم الأردى

تراب , فوق , تراب ..

               ... يمشي بلا مبدآ ...

........

مرحبـا.. جميعاً ..

ِ أشتقت :) لكم ِ ..

ولمسآحتي هني .. شعوري انه عيزانه افضفضه ..

لأني مشتته , مابين اشيا وايد ..

والظروف ماتسآعد .. ولكن نحمد الله على كل حال ..

حلو الأنسان يلاقي حوالينـه وآيد ناس..بس مب حلو يتملكه أحساس الخوف تجاههم ..

يخآف يقرب .. ويبعدون .. ويخآف يبعد .. وهم يقربون..

حلو الأنسان .. يلقى  الأشياء مريحه جدامـه..

ولكن .. بينه وبين نفسه " يعاني " .. والسبب صدمه..

آخر الليل / هي فترة تزاحم الأفكار .. واعتقد هذا الشي بديهي لكل أنسان .. خصوصا الحساس ..

طبيعتي .. آخر الليل .. يا انام من كثر التعب .. يا اسهر من كثر التعب ..

الفرق بين الأثنين .. النوم مريح .. وينسيك ..

والسهر .. هو طريق لألهامك .. سواء كان بشكل ايجابي أو سلبي..

يا يزعلك .. وتنهار .. او يخليك تبدع بأتخاذ موقف ايجابي  ..

//

بسبب الأحداث السياسيه .. اللي خلتني اكره دوامي ..

اليوم قررت اني اوقف هالمهزله والتهاون . بيني وبين نفسي ..

يعني قلت / خلاص بلا مصاخه لازم تداومين لو مهما كانت نفسيتج تعبانه او مالج خلق ..

وفعلا ..راح ابدي أداوم .. من يديد ..

لاني مابي اخسر دراستي ..وهذا قراري من اول مادشيت الجامعه ..

ومابي اتهاون بالموضوع لاني خسرت شي قبل..

والشآطر اللي مايكرر الغلطه مرتين ...

//

الأهمال اللي كان له اثر على نفسيتي ..

تهاوني بالدراسه خلاني احس بالذنب ..

ولكني مصره اني اعوضها ..صح انه ماغبت وآيد ..

بس احس اني تهاونت .. وماكان المفروض يطلع مني هالتصرف..

اعترف اني غلطانه..

//

احس اني مقصره بحق هلي .. وهو شعور مب حلو

احس ان المفروض اكون جريبه اكثر خصوصا هالفتره..

بس مادري شلون ارتب نفسي..

يعني ودي اسوي كل شي مره وحده..

وكل شي مهم في نفس الوقت ..ماقدر أأجل شي..

وهالشي يحسسني اني فاقده التركيز ..

//

تصدقون .. ودي مره امي تحس شكثر أحبها ..

ولكني خجوله منها .. بالذات امي ..

احس اني استحي منها اكثر من اي حد

مادري ليش

ودي ألمها واقولها اني اطلب رضاج ..

//

عندي دكتور.. صارلي موقف معاه " اكرهه " ..

ولكن اليوم احتك فيني مره ثانيه ..

واشوفه مهتم انه يتناقش معاي ..

ولكن .. صرت مافهمه ..

لان مرات يقط كلام ..يحبطني ..

** حسن النيات مطلوب ..

ولكن مادري هل هو يحاول .. يطيحني من طموحي ..

عشان اصر على النجاح .. واكون اقوى..

ولا فعلا قاصد كلامه ...

شي محير...

//

من اول مابديت احط النقاط على الحروف في حياتي

وابتدي خطة يديده ..لكل شي ..

ماكنت اتوقع ان الدنيا ..فيها ناس ( حمقى )

ولا ناس تحمل في قلوبها ( حقد )

لمجرد ان الانسان يخالفني بالرأي ؟! ممكن أكرهه او اأقلل من قيمته ..

الناس قاعدين ينسون المثل اللي يقول .. " الناس للناس / والكل بالله "

مادري يمكن لان بيئتي وتربيتي .. علمتني اشياء ثانيه ..

ومستحيل اعامل انسان .. بمثل معاملته لي ..

بس غريبه الناس فعلا...

مادري شنو بياخذون من الدنيا ؟! غير قبر وكفـن ..

الله يهدي الجميع ..

//

وآخر شي حبيت أكتبه ..

أني احب اخوي .. أحبـه .. لأنه وآيد يحن علي ..

ولاني اشوفه انسان " ذهب " .. مايتعوض ..

طبعا انه احب كل اخواني ..وكلهم ماستغني عنهم..

لكن..بحكم انه أكبر مني .. يخجلني .. دايمآ .. بحنيته علي ..

أحبـك / يآ آخوي :)

وأحبكم أنتوا .. بعد :)..

تصبحون على خير