آخر بوست لسنه 2010

السلام عليكم ..

شخباركم اتمنى انكم بصحه وبخير وعافيه

// هذا الاسبوع الاخير من هالسنه .. بسميه اسبوع المفاجات.. //

وصج فعلا وايد صارت أمور .. بعضها كانت حلوه وبعضها سيئة .. وطبعا مافيه شي في هالدنيا كامل

يوم لك ويوم عليك ..

اول شي في هالاسبوع .. كنت مارقد وايد .. ساعه ساعتين واقوم.. لسبب ما ..

هالايام حبيت اللاب .. وصرت اجابله بزياده ..

هالايام كان فيه راحه نفسيه وشعور حلو ..

رغم ان اخر يومين صج حطيت حرتي في النوم .. ورجع بعض الشتات لافكاري ..

ولكني ابشركم لازلت قويه .. واللي عشت فيه لمجرد لحظات عطآني امل كبير ... بأن الحيآه لازلت حلوه ...

//

** نغـزه ..

بخصوص ان فيه شخص شفت صورته .. وقام يتدلع ( صج صج  ) قاعده ازعل ..

لازم الواحد يعرف ان الجمال " جمال الروح " ..وانا شخصيا الجمال مومهم عندي كثر مايهمني اخلاق الانسان ومبآدئه ..

بعدين يالطيب " انت على راسي " من طيبك اشوفك أحلى الناس وأبديك عليهم بعد ..

//

رسالتي اليوم ..

لصديق غالي .. /  انه مافهم شاللي تمر فيه , ولكن فعلاً ومن كل قلبي اتمنى تكون بخير وترجع تشوف حياتك

انا مادري سبب الضياع والشتات اللي تعيشه , يمكن لسبب اني ماعدت اشوفك وايد او اكلمك ., بس فعلا لازم توقف هذي الدوامة اللي تدور فيها .. وتستعيد كل شي .. انت شخص رائع بمعنى الكلمه .. حرام تضيع حياتك من يدينك ..

أدعي لك من كل قلبي ان الله يمسح على قلبك ويخفف من الألم اللي فيك ..

//

همن ودي اتكلم بشكل بسيط عن موضوع .. عرفته من جم يوم .. وبصراحه ماكنت اتوقع فيه ناس متخلفين لهالدرجه ..

بداية .. اعرف بنت ‘ تعرضت للتحرش من خالها ..وهذا بالنسبه لي بصراحه صار في زمننا عادي .. لانها مو أول وحده تشتكي من جذي .. ولكن احنا نتكلم شلون الخال يتجرأ على وحده من لحمه ودمه .. المشكله اللي قلوبهم ثقيله من الذنوب .. الله يغشي ابصارهم واحساسهم ويصيرون مايحسون .. عموما انه ماتكلم عن هذي النقطه ! .. انه بتكلم ان البنت يوم تعرضت للتحرش راحت تحتمي بأمها ..وخبرت امها .. لكن الأم للاسف .. راحت كلمت الخال .. وقالت له شلون تسوي جذي ..

تتخيلون شصار .. راح قال للأم .. انا كنت اختبر بنتج! .. انتي ماتدرين شنو الشباب يتكلمون عنها .. المهم الأم شكت في تربيتها اكثر مما شكت في اخلاق اخوها , فراحت و اتصلت على الخطابه .. وقالت لها شوفي واحد حق بنتي ! ..

قمة التخلف ترى!! .. ياناس شنو اساسا هالناس اللي احنا عايشين بينهم ؟

يطلقون علينا اسم شاذين جنسيا ! , لان عشقنا اشخاص تعشقنا ؟..باتفاق مسبق .. بقصة حب مكتوبه , برضا من الطرفين!

شنو نسمي هذي الفئه اللي الكل يغطي عليها , من موقف الأم طبعا هذي المفروض يشتكون عند جمعية العنف الأسري ! ..

 ومن موقف الخال هذا المفروض يأدبونه ويوقفونه عند حده لاانه اعتقد اللي يوصل لهالدرجه .. تعتقدون شنو ضميره..

من ناحية ثانيه .. انه مادري ليش دايما يقولون الصبي شايل عيبه ! .. شفيه الصبي زود في ذمتكم ؟..

ياما بنات احسن من الصبيان مليون مره .. ياما بنات سنعو الصبيان ..

انه فعلا كنت اعتقد هذا شي ينقال وبس ..

بس يوم قالت لي عن الموقف..

انصدمت فعلا .. وانه للحيني مصدومه وما اجذب عليكم اتمنى تحترق الام بأخوها .. عشان تطلع من يدهم هالبنيه ...

.. ودي رايكم في الموضوع ..

//

طبعا الحين بتكلم عن اخر لحظات 2010 ..

امممم قررت الليله .. سهرتي تكون خاصه فيني .. ( بس ) ..

قررت أحييها ببساطه وبتواضع ..

جهزت شموعي .. وراح أولعهم .. وأخليهم يحترقون مع كل شي راح ..

 وبسميها لحظات تأمل .. وأمل ..

وراح اسمع دعاء .. الشي يكون روحاني .. ابي اتمنى .. والله يسمع قلبي ..

 عشان تكون سنه انشالله .. حلوه ..

على فكره بيكون تاريخ مميز 1/1/11

ومابيتكرر الا عقب مليون سنه << خخخ هذا وايد يطرشونه عالبيبي ..

//

*_* وانه اكتب البوست اتصل صديقي p; ويقولي كل عام وانه بخير .. فديته :*

وهالشي اسعدني عشان ذكرني من الصبح يعني ... وهو أول شخص ..

اتمنى له التوفيق والحظ صوووبه انشالله ..

والله لايحرمني من الاشخاص اللي تذكرني وتعزني ..

ولا يحرمني منكم ...... ( أحبكم )

كل عام وانتو بخير

S.M.I.L.E.~ like a childW.O.R.K. ~like you need the money

 D.A.N.C.E~ like nobody's watching

L.A.U.G.H~ like you don't care

S.I.N.G ~like no one will hear you

P.R.A.Y~ like you'll die tomorrow

L.O.V.E:$♥ ~ like you've never been hurt.. Cuz we've only got

O.N.E life & u gotta start L.I.V.I.N.G it ♥

n9 gulb ;*

email : n9.glb@hotmail.com

2011 ~

مرحبا شخباركم ..

وحشتوني ,. كثيرن ..

اممم من امس لليوم استقبل اتصالات غير متوقعه ..

بخصوص ان الآدمي أحيان يفكر ! .. شفيهم الناس يذكرونا مره وحده

بس يزاهم الله خير ماقصروا . صراحه يزيدونا ثقه .‘ بأنه مهما مرت الايام مردهم لنا ..وهذا شي سنع ..

/

بخصوص اني قبل لا استقبل هالاتصالات كنت احلم ..

يالله احيان افكر شهالمحبه الصادقه .. اللي تخليك تحس ,.. في أتفه الامور حتى وانت ناسي وعايش حياتك

شهالتواصل الروحاني .. اللي يجرك صوب شخص تلاشى اساسا من حياتك ..

لمجرد انك كنت في يوم صادق وتحبه من اعماق قلبك ..

عموماً .. رغم اني ماعرفت سبب الأتصال ..لكني أتمنى خير ..وكل الخير ..

/

بتكلم عن

سنة 2010 ..

سنة جداً مرهـ ‘

رغم اني عرفت اشخاص مميزين بحياتي ..

اشخاص كان لهم اثر وتأثير واضح علي ,.

اشخاص تعلقت فيهم .. أشخاص امتن فعلاُ واتشرف بوجودهم في حياتي ..

الا أني في نفس الوقت خسرت بعض الاشخاص , المهمه ,

ربي لك الحمد ..

من ناحية الدراسه , واعمالي / الحمدلله هالسنه كانت بداية قوية وجديده في حياتي ., وأتمنى اني اكون في طور التطور والنمو للأحسن ..

من الناحية العاطفية..

كانت حياتي شبه خاليه , مع وجود بعض المشاعر الغير مستقره ., ولكن نهايةُ المنعطف.. حسيت انها فتره راحه عشان استعيد كل الي خسرته من حياتي العاطفية السابقه..

من الناحية الأجتماعيه ووجود الأهل..

اعتقد الظروف اللي مريت فيها  ‘ خلتني ارجع لأهلي ولوجودهم في حياتي ..

بصراحه ماقدر أستغني عنهم .. طعمهم بحياتي شي ثاني

سنة 2011 ~

سنة التعب والأمل والطموح والأهداف ..

- اتمنى استقر عاطفياً ..وارتبط بعلاقة جادة ‘ بعلاقة تستاهل التضحيه والحب والأحترام ..بعلاقة تستحق دفع رصيد ماتبقى من العمر والتعب ..

- أتمنى ان اتخرج وأحصل وظيفه محترمة ..

- اتمنى أن يكون انتمائي لديني يكون اقوى .. وألتزم بصلواتي اكثر .. وهذي امنية مشتركة بيني وبين صديقي..

- اتمنى اني انال رضا امي اكثر ..ورضا ابوي وهلي ..

- اتمنى تمر فترة الدراسه على خير , بدون ماحس بالضغط والأرهاق النفسي...

/

خطواتي لأستقبال سنة 2011 ..

- سجلت في بعض الجمعيات .. كمتطوعه .. واتمنى يكون دوري فعال, واقدر انفعهم بشي..

- افكر اسجل , بمركز تحفيظ قرآن .. " لحد ينصدم "

- قررت اظل هادية .. و هادية وهادية للأبد .. وراح انسى كل شي مر ..وراح انسى هفوات كل الناس ..وانا سامحت واتمنى بعد الكل يسامحني لو غلطت بحق أحد , وقبل هذا كله ارتجي من الله يغفر لي ذنوبي ..

/

/

اممم الاحظ بعض من الناس .. الي يقرون مدونتي ياخذون فكره باني انسانه حزينه او لغز في الحياه ..او هاديه وكئيبه..

لا بليز ..انه انسانه عاديه مرات افصل واضحك واستهبل وخصوصا اذا مروقه مزاجي لا يعلى عليه ..

ولكن هدفي من هالمدونه ان يكون فيها شي ملموس بالواقع والانسان يقدر يستفيد من تجاربي ..

و انا ماكتب الا اذا كنت رايقه واقدر احول الافكار السلبيه , كـ دافع للأمام..

ليس اجمل ولا أطيب ولا أنبل من الكلمة الطيبة والوعي في القول والخطاب وفوق ذلك كله الحكمة

أتمنى ما طولت عليكم في كلامي..

نص قلب ~

هم الحياه .. ألم وحفـنة أمل ..

مرحباً ..

صباحكم سعاده وأمل ..وخير يارب..

في البدايه ابتكلم عن بعض الأشخاص في حياتي .. أنه وايد ممتنه لوجودهم ,..

ممتنه للأشخاص اللي يخلوني أبتسم , اللي يعطوني الثقه ويأمنوني ويشاوروني بأمورهم الخاصه..

ممتنه فعلاً , لأني اشوف بعيونهم قدري , وهالشي يخليني ارضى على نفسي.. ويهون علي امور وايد بقلبي ..

على بالي صديقه , وحشتني .. مادري اختفت من الوجود , ولكنها في يوم ماتركت الا كل خير , وأتمنى أنها بخير .. وتذكرني بالخير..

على بالي اشخاص طيبه .. مرت علي , رغم اختلافنا في بعض الاشياء .. ورغم فراقنا على اتفه الأسباب المقنعه , الا اني لازلت اذكر علاقتي فيهم .. لانهم في يوم كانو معاي .. وانا لازلت احمل لهم كل خير في قلبي ..

/

حياتي .. الراكده , بدت أرضها تتنفس , وجريب راح تكون خصبه وتزهر وكلي أمل بأذن الله تكون مليآنه بالشي الأفضل والأحسن..

عمري .. بدآ يمر .. بديت أكبر ‘ فعلاً أكبر ؟! ..ولكن الكبر شي متعب , وخصوصاً ..يظل فيه شي ناقص " لان النص قلب " ماعتقد أنه يتعوض ..

بصراحه اتمنى لو اقدر اوقف عمري لين هني ...

/

من أمس لليوم , كنت أحمدالله على بعض المواقف الخايبه في حياتي ., حاجتي لناس قريبه ,, وغيابها .. خلتني اكون قويه .. واشوف نفسي , واعرف نفسي .. واعتمد على نفسي وهذي نعمة من رب العالمين ..

- اذكر نفسي مرات .. لين يشتد الضيق واصيح ‘ وامسك تلفوني .. وبدق على صديقه " تركتها " ولكن مكانها فاضي ‘ الشعور اللي يكون ان هالصديق هو اللي كنت تصيح عنده وتتضايق وراح .. وخلاك ؟.. تدق ! تلفونه مغلق؟ او مثلا تفكر انه مابيرد, او احيان يطري على بالي الشعور اللي ادق عليها وانا اصيح .؟ بتعتقد اني احتاجها فعلا وماستغني عنها ,. وبتستلعن علي زود ؟ ليش ! ..وارجع تلفوني مكانه .. وافضل مخدتي .. ولحافي .. وانام ودموعي على خدي ..- ويوم اقعد من النوم ! / اقول الحمدلله ماتهورت وتسمعني تعبانه هي بتضايق وانا بتضايق ..اقول الحمدلله قدرت اتمالك نفسي واعدي كل شي بنفسي ..

طبعا هذا موقفي من الاشخاص اللي تركونا .. او جرحونا .. انه شخصياً اسامح بس روحتهم بالنسبه لي راحه ..

اليوم مع شخص مقرب مني كنت اسولف .. يتكلم عن انه خاصم الكل وقعد مكانه .. ومايبي احد وبيترك الكل ..

لانه فشل في علاقه ؟.. وبدا قلبه وعقله يعيشون في شتات نفسي وعاطفي ..

انه اعتقد ان الفشل بداية للنجاح , والفشل بدآية للقوه , والفشل بداية للأصرار, كلنا نفشل ؟ بس هل فشلنا يعني موتنا؟

او انعازلنا , أو دمارنا ؟

الناس ملح الحيآه , ومانقدر نستغني عن وجودهم , رغم انهم يكونون سبب لاحداث غير مرضيه بالنسبه لنا ..

بس يظل وجود الناس , هو المحيط اللي مالنا غنى عنه , يظلون هم النكهة الطيبه في يومنا .. يظلون هم سبب نجاحنا لين داسونا .. وسبب قوتنا لين جرحونا ..

في حياتي السابقه " التعيسه "

ماي أكس .. اتبعت خطه ذكيه ..‘ ظلت تشك فيني اخون ؟

ويوم حاولت أبرر لها .. طلبت مني أقطع علاقتي كلهم ..

عشان اكون لها .. وفعلاً لأني احبها تركت الكل ..

وعشت لها ..

خل نشوف شصار ؟!..

بعد فتره اكتشفت لها ايميل وتكلم مليون .. وغير هذا حبيبتي كانت محترفه في الخيانه : )

أنا خسرت كل اللي حواليني وهي عاشت حياتها!..

النهاية الطيبه .. الرضى بالواقع شي زين , والمكتوب من الله حياه الله ..

وانا ماتذمر لاني خسرت ناس .. لان هذا خطأي ولازم اتحمل نتيجته..

/

وعيبي : اني كرهت الناس بعدين وانا اعترف بعض الاحيان مايكون عندي ثقه بكل من ..

/

العبرة المستفاده :  1 - اخذ الحذر 2- عدم التضحيه باشخاص عشان شخص واحد  وكذلك انه صرت اقوى واقوى ومليون مره اقوى ..

واشيل جبل على ظهري لو تبون << خخخ قويه ..

وبالنسبه للاشخاص اللي راحو .. فالحمدلله الله عوضني بديل وافضل مليون مره .. واللي رجع يكلمني فهذا عزز ثقتي اكثر فيه ..

خلاصة الموضوع .. النآس للناس .. طلعت ‘ فوق .. نزلت تحت ..



النسيان

السلام عليكم ..


16 يوم .. ونبدي سنة جديدة ..
ونعيش حياه افضل بأذن الله ..

 16 يوم ..ابتداءاً  من اليوم بتكون نص اجازتي الجامعيه ..
 اللي قررت ان استغلها بقراءة بعض الكتب الي اشتريتها من معرض الكتاب وللحين مافضيت اقراها...
روايات ومن ضمنها كتاب للشاعر أحمد مطر ..
وكذلك قررت ان اشوف بعض الافلام بعد اللي ماتفرغت لها : ) وموجوده عندي هني ..

 المتعه مطلوبه خصوصا اذا كان البرنامج اليومي .. مضغوط من الناحيه الدراسيه ..
وخاليه من الاجواء العاطفيه .. اعتقد يكون اليوم مشحون جد بجد .. حتى كلمة حلو مانلقى خخخ
ومن ناحيتي بستمتع كثر ماقدر في عطلتي ‘ لان اذا بدت الجامعه ‘ مابيصير عندي وقت حتى ارقد فيه ..


/

 أخوي الحين معاي بالغرفه .. اعتقد انه زعلان او تعبان بالاحرى مادري ..
المهم خليته يرتاح تحت عيني .. وانه سهرانه وادون بهدوء ..
لاني يوم اروح له الغرفه .. هناك لقيته نايم وهو قاعد ! ..


اعتقد انه يعاني من ألم في بطنه " اثار العمليه الاخيره " .. دعواتكم له..


/


في عطلتي احس اني احتاج لبحر ! .. ايه بحر بحر بحر .. ولآخر نفس احتاج لبحر
اممم انه من النوع اللي اكثر شي احب اقعد يمه .. بحر ..

ومع موكا حار والجو شوي بارد .. وتتأمل بخلق الله ..بس اهم شي نحاسب لا يحوشنا برد يعني كلش مب ناقصين ..




المهم خلونا بعيد عني انا خلونا في الاأهم ..
بما أني تكلمت عن قدر المتعه اللي ابيها في عطلتي ..
ابي اتكلم عن شي لازم نسويه ونفكر فيه قبل الاستمتاع .. عشان يحصل لنا نستانس من قلبنا..

سنه يديده المفروض تكون يديده بكل شي .. احنا " بشخصنا " لازم نكون يداد ..
نشوف أخطائنا .. ونصلحها .. نستعيد كل شي حلو فينا .. ونحاول نجعل هدف يديد في حياتنا نوصل له..
ونقوي ارادتنا .. ونسعى عشان تكون حياتنا احسن من المستوى اللي احنا عايشين عليه ..
بس اعتقد قبل هذا كله ! .. لازم ننسى .. ومو اي شي ! لازم ننسى كل ذكرى حزينه وموجعه
كل شخص جرحنا ونسامحه ونتركه للدنيا .. وعلى الله جزاه ..
لازم نصفي قلوبنا .. وندفن مواجعنا في مقبرة النسيان ...

قال جبران خليل جبران / النسيان شكل من أشكال الحرية..

اعتقد هذه اشاره واضحه لنستعيد الحريه في حياتنا وسنتنا اليديده .. لنستعيد قدرتنا على امساك زمام الامور ..
لننسى كل وجع ., ونبتسم من جديد .. خلونا نبتسم ..بعد السنه اللي قضيناها في ألم ..
لاننا احرار ..وهيهات ان نكون عبيد للذكريات السيئه ..

كذلك  " النسيان أسهل طريقة للحياة...عبد الرحمن منيف "

تبي تعيش؟ انسى كل عوار قلبك ..بيع ذكرياتك السيئه كل يوم في اخر الليل ..
الحياه حلوه : ) بس نفهمها ..
ارادتنا لازم يكون فيها زر اوتوماتيكي يساعدنا على نسيان الامور السيئه ..
ولكن تذكر ! ان هذا الشي بيدك...

/

انه احمد الله ان قراري بالنسيان لحب مايستاهلني هو اكثر قرار صائب اتخذته هذي السنه ..
واخيرا ليس اخراً

اتمنى لكم حياه سعيده وهنيه .. وجعل الله الذكريات السيئه منسية..

وقبل لا اصك الصفحه ..

خل احطلكم كلمات عن النسيان اعجبتني ...

النسيان الذي يكون هروبا هو : ضعف ،
كثيرا ما نتناسى مِن الحياة أمورا كثيرة ، وقد تكون في غالبها هامة ،
ونذهب ونتعمد الهروب بعيدا عن الشيء بحجة النسيان .
هنا لن نحل الأمر الذي نهرب منه ، بل على العكس نزيده سوء .
بين النسيان والتناسي شعرة
كالتي بين العبقرية والجنون .
الفرق يكون في الاعتقاد ، وتسكين الضمير ، وترطيب النفس
حتى تقبل الفعل المُراد التخلص منه بحجة النسيان وبفعل الأمر ” انس “النسيان النعمة هو الذي وهبنا الله سبحانه وتعالى إياه ،
وجعله طريقا لتخفيف الألم ، وتضميد الجراح

وكذلك سأبدأ ليلتي برواية أحلام مستغانمي نسيان دوت كوم

وتمنوا لي نسيان موفق :)

12/12

مرحباً ..

شعور ممتع لما تحس ان اعصابك مسترخيه .. وانتهت كل عروض " الدنيا " وانتهت المسرحية!

شعور جداً ممتع لمن تلاقي نفسك تقدر تعبر بمرونه عن كل شي يدور في تفكيرك وعقلك ..

وتكون على طبيعتك من هو قريب منك .. بس بشـــرط ..

اختيارك .. هي اللذة  في بقائك ..

من فتره وجيزه .. علاقتي بصديقه اعرفها اصبحت قويه ..

بغض النظر عن اختلافاتنا .. الجنسية والعرقيه ..

كان يربطني فيها ، شي ماعرفه ..

عموماً .. اعترفت لها بأني مثلية .. وكان اول شي عطيتها اياه مدونتي..

بصراحه كنت متردده في اني اخسر صديقه عزيزه .. وخصوصا هي انسانه مريحه جداً التعامل معها مرن وسهل ..

ومثقفه و واعيه وانا احترم هالنوعيه من الاشخاص بالذات ..

ولكن بعد تفكير لا يتجاوز 10 دقايق قررت بأني اعطيها اياه واتحمل اي ردة فعل .. منها..

يعني كنت افكر ! شراح تسوي اكثر شي .. بلوك + ديليت ..

مومشكله لازم اتحمل نتيجة تقبل الناس لشخصيتي المغايره عنهم..

واذا الله مو كاتب لي تكون من لستت صداقتي فما عندي اي اعتراض

/

الحمدلله هي تقبلتني .. وصرت اقدر اتكلم معاها في مواضيع اكثر بدون حدود..

بس صرت أفكر من بعد هالموقف .. ياه شنو هالدنيا بسيطه .. ولكنها تحتاج لشوية مواجهه ..

يعني احنا ليش نخاف بأن نعلن مثليتنا ؟ ونخاف من ردة الناس ؟ ونخاف من هجرانهم لنا ؟ ..

والنتيجة نظل بعذاب .. ونتألم وبصعوبه نلقى احد يواسينا .. ويجبر خاطرنا ..

قبل سنين .. يمكن اربع او ثلاث ..

كان عندي ربع ! .. وهالربع تركتهم لاني تعرضت بسببهم في موقف .. وبقضية " انهم ماعرفو قدري "

المهم انه قراري اتجاههم كان الترك والرحيل ..

انتهت القضية لخسارة صداقتنا وعلاقتنا .. والحمدلله هذا شي مريح من ناس ماتطلع منهم الا المشاكل والجروح..

بعد سنه من اني قطعت علاقتي فيهم ..

رجعوا وكلمو اختي! وخبروها اني مثليه ! رغم كونهم مثليين ..

المشكله كانت صديقتي الصدوقه تحب وحده تحبني وانه كنت مرتبطه في حبيبتي ..

فأنتهى الحقد إلى انهم يوصلون لأهلي عشان يفركشون الموضوع..

اللي صار ان اختي تفاجأت بالموضوع! .. وماعرف شصار فيها

حضروني..انه في غرفة اخوي .. واختي معاه..

وقعدو يستجوبوني! بخصوص علاقات قديمه وهي  اساسا مجرد صداقات ..

سألوني تدخنين!..قلت مرات..

ومع تحقيق عنيف .. حصلت منه طراق على ويهي!

رغم ان نظام بيتنا غير عنيف ابداً .. ولا تعودت على الطق ..

عشت مستقله اي شي ابيه اسويه وهذا طبعي من يوم انه صغيره ..

أنتهى الوضع في النهايه بأن أختي قررت تعرضني على طبيب نفسي!

ورفضت!..

ليومكم هذا .. كنت أبحث عن الذنوب الصغيره التي اقترفتها ..

لان أتعرض لهالمعامله ..

ادري يمكن حب منهم وخوفهم علي..

ولكنهم نسوا يسألوني عن مشاعري؟

نسوا يتقبلوني مثل ما أنه ابي .. ويحبوني مثل ما أنه ابي ..

اعتقد الانسان اذا كان بيتغير ..راح يكون عنده سبب مقنع ويستحق ..

وماراح يتغير عشان اشخاص حوالينه ..

الموضوع ..اللي يطرح نفسه ..

خلونا نتكلم .. بكونا احنا .. مثقفين واعين .. ناس جداً طبيعين !

ماشوف قصور ! فينا .. ومشاعرنا لازالت مثل مشاعر باقي الناس

نحب نكره ..نتألم .. ويمكن احنا اكثر الناس قوة .. لاننا لازالنا .. نتحدى كل اللي حوالينا عشان ذرة نفس ..

وعشان نحقق أحلامنا ونعيش بسلام .. و طموحنا ابدا مايتعدى .. سوا احترام  بعض الناس لفئتنا ..

في نظري احنا الفئة المظلومه التي تلقى العذاب من كل الجهات ..

الاهل / الواقع / الناس / والأصحاب ..

ياترى من بقى لنا ؟

اخيراً .. راح اتكلم برآيي الشخصي ..

انه ماخذه الدنيا ببساطه .. وعادي مايهمني موت ولا حياه ..

لاني على ايمان بان الله سبحانه وتعالى يعرف اللي بقلبي ..

ولو خذاني مافيه حد بيرحمني اكثر منه ..

والحياه .. لازالت بالنسبه لي نعمه ..

بالنسبة للي حواليني .. ودي مره اوقف جدام امي واعترف!

باني رفضت الزواج قبل..لأني مثليه .. وشكثر حلمت اني اشفى من مثليتي عشان ارضيها واييب لها درزن عيال..

ولكن طالما الحظ لا يحالفني ..والاحساس مايزورني .. وعيّيت يدي على وداع المثليه تهتدي ..

شسوي .؟!

بعد فراق حبيبتي تمنيت اني انسانه احس بشعور البنت اللي لمن تخلص دراستها وتبي تتزوج..

وتعيش حياتها بطريقه تقليديه .. وتكون مأنسه الناس اللي حوالينها ..

* لكن كل شي ايي في البال .. ينتهي بسؤال ..

أفكر هل هي مستانسه؟ " اعتقد ان واحده من 15 أمرأه سعيده في حياتها ..

لان حتى الزوج والزوجه تربطهم علاقة مصلحه؟! جنس  ..و .. و.. و.. الخ ..

* عن نفسي ياما تمنيت تكون نهاية دنيتي .. على صدرها لامتني .. وانام وحتى لو فيه مجال للموت خلوني اموت..

ولكن مع الايام بدت الاحلام شبه متلاشيه ..طالما لم يكن هناك قلباً صادق .. وداعاً يا حياه .. و وداعاً يا حب ..

حبيبتي / يمكن يوم تطيحين على هالمدونه وتقرين كل حرف ..

كنتِ حلم .. ولكنه تلاشى..

كنتِ أمل .. ولكنه ضاع..

كنتِ قلبي ..ولكنه انكسر!

وجودج مايعنيلي شي .. ولكن كلما فتحت مخي افكر .. لقيته ياب طاريج ..

اتساءل هل تستاهلين هالحب وهالمشاعر والذكريات ؟..

مسرحية الحب ! انتهت .. كل الافلام انتهت .. وكل الاقلام رفعت ..

وتعرفين شاللي بقى ؟! ..

نص قلب .. محدن يقدر يداويـه .. حتى انتي .. ماعاد ينفع وجودج

10/12

مساء الخير ..

* توني قاعده من النوم * بعد اسبوع طويل وشاق خخ ..

ومليء بالاحداث الغير رومانسيه .. في صديق عزيز علي اعجبه صوتي خصوصا اول مره سّمعه ..

وامس كان على بالي وايد .. واحس لو وده بيكفخني .. بس للاسف كنت مشغوله شوي وماقدر ارد عليه عالمسن او اسولف وياه وايد

:) أنــا آسفه يا صديقي ...

/

اممم اظن ان الاسبوع الياي ... هو اسبوع رحمه بما أني باقي علي امتحانين وينتهي الكورس .. ويبقى عذاب المعهد فقط ..

بس يقولون العوض ولا الحريمه .. هههههههه

يعني واخيرا الواحد يداوم بس الصبح ويرجع يحذف روحه وينام نومه عميقه للابد ..بس يمكن : ( تكون نومه متعبه عاطفياً

آخر كلامي ماتحسون يالعزوبيه ملينا / الواحد ينام بروحه ويقعد بروحه ... لا احد يصبح عليه ولا يمسي .. بس يالله الحمدلله على كل حال

/

اول امس بالليل .. كنت اكلم شخص عزيز على قلبي وهو نفسه اللي قدمت له الاعتذار عن انشغالي .. كنت احس صوته تعبان

وانا ادري ان الليل هو اكثر شي يخلي الانسان حزين ..بما معنى كلامي ان من يجي الليل وخصوصا وقت النوم يحس الواحد انه مخنوق وماله خلق شي و وده لو يموت .. لاني فعلاً يوم من الايام حسيت بهالشي وحسيت مهما كان احد جدامي راح يسويلي شي او يحاول يسعدني ماراح استانس .. راح تبقى الحياه في عيني نقطة سوده .. تكبر ولا تصغر ..

- عديت هالمرحله مو من فتره طويله - بس من فتره اتخذت فيها قرارات صارمه في حياتي .. كنت اقوله وانا عالخط معاه ..

لاتزعل على ناس شافو حياتهم وعاشوها واحنا للحين واقفين بنفس المكان ننتظرهم! ..ترى اللي مافيه خير من البدايه مافيه خير من النهايه.. واعتقد احساسك اللي كنت تحس فيه ماهو الا لسبب واحد ..

تعرفون شنو!..

" احنا " مو غيرنا ..

أسألوني ليش؟..

في رايي الشخصي / ان احنا لين انجرحنا من شخص نحبه . وظلينا نذكره باقي الليالي ونفتقده دون مبادره في الحصول على البديل .. طبعا مو شرط حبيب .. ولا شرط علاقه ..ولكن لازم نلهى ونعيش حياتنا ونحقق شي بعد فقدانهم عشان ترتفع معنوياتنا ونحس ان صرنا اقوى وفيهم ولا بدونهم ماشيه حياتنا احسن مايكون ..لازم نواجه واقع قلبنا المجروح .. ولا نقعد نطبطب عليه وعلى جروحه لين يوم ينفجر ونموت...لازم نستمتع في كل لحظه في حياتنا لان اللي راحو ابدا مابيرجعون ..وحتى لو رجعو ماراح يعوضونا لحظاتنا ولا خساراتنا .. ويمكن وقت مايرجعون اساسا تكون طابت النفس منهم .. وماعاد نبيهم ...

حافظ على نفسك وبيع من باعك ..وحافظ على قلبك  ‘ وخفف من اوجاعك

/

بعطيكم مثال من جانب حياتي التعيسه السابقه..

حبيبتي كانت تموت علي ..لآخر درجه للاسف انا ماقدر انكر هالشي !..

بس بعد ماكتشفت خياناتها المتكرره وزادت الجروح ... سألتها اذا انتي تحبيني ليش تجرحيني؟

قالت لي مادري! .. انه فيني طبع اذا وصلت للشي مادري ماعرف اتصرف..

بغض النظر عن هالكلام ..

في آخر أحلى مراحل علاقتنا .. بين مشاكل كبيره وتحديات..

قررنا نسافر .. وصج انا ماكنت اتكلم غشمره..

قلت لها تتخلين عن اهلج عشاني..

قالت تكفين اخذيني ...

قلت لعيونج اخذج .. عطيني فرصه اهيأ نفسي..

وطبعا اول مافكرت فيه اطلع من دراستي!

وصج انه طلعت واشتغلت في مكان ..براتب متواضع

المشكله مر الشهر الاول عادي .. مر الشهر الثاني كله مشاكل .. وياني اتصال من امها يقولي !

ليش بنتي هونت عن الزواج @_@

انه ها .؟ اي زواج ..

قالت بنتي متقدم لها فلان وهي كانت موافقه بقى عالملجه يومين ! وهونت ..

خانتني العبره لان حتى ماكلفت على روحها تقول لي ؟

خانتني العبره لاني قاعده احاول اكون معاها وهي عندها تخطيط ثاني..تعيش حياتها فيه..

اللي ابي اوصله ! .. ان احنا طيبين زيادة عن اللزوم وعواطفنا تجرفنا ..

والحب المثلي يحتاج تضحيه كبيره .. ولكن تعلمت من تجربتي لاخيره ان الانسان مايضحي باولويات حياته بمستقبله ..

ودراسته ..وباجر بأهله .. وربعه ..

لاني ادري وفي النهايه كلنا ندري اذا طحنا محد راح يشيلنا غير الاهل .. حتى لو كانت الحقيقه المره مانقدر نبوحها لاي احد ومانقدر نعترف لهم بأن سبب هالاكتئاب .. هو حبيبنا اللي من نفس جنسنا..

/

واذا كنتو تبون تعرفون ردة فعلي .. فأنا اكتفيت بأن اوشم تاريخ فراقنا وحرفها على جسمي .. اخاف اموت وهي ماتدري متى جرحتني الجرح الكبير .. << كان هذا تفكيري وقتها ..

اما تفكيري الحين / فاعتقد انها ماتستاهل اني افكر فيها ..لاني قعدت سنتين افكر فيها مع نفسي شالمفروض اسويه ..لين استقر الحال باني استعدت حياتي كامله .. من الناحيه الدراسيه ... ومن النواحي الأخرى خلوني اسولف لكم عنها مسقبلاً..

5/12

مساكم الله بالخير , ومبروك للكويت الكاس

وماشالله كل الدول الشقيقة .. يحتفلون..

الأمارات بالعيد الوطني

قطر لقبولهم لأستضافة كأس العالم لـ 2022

الكويت - بالكاس ..

والله يديم الفرحه ..

//

ماراح اتطرق الا لبعض الأحداث اليومية المعتاده..

علميا َ ..

طبعا يومي كان مشحون بجو الدراسه كنت بين برزنتيشن للمعهد ..الللي قمت عشانه من صباح الله خير عشان بشتغل عليه ..

يعني بالاحرى قمت 7 .. وكلاسي 9 .. وخبركم الواحد اذا توه قاعد ماله خلق شي .. يدوب وده يتثاوب .. ويمكن يفكر يسوي طاف لكل شي ..بس كنت نشيطه لا بأس فيني ..

كان عندي امتحان بالجامعه والحمدلله سويت زين " بالغش طبعا " ههههههههه ..

عملياً ..

أعتقد .. أو أغلب الظن مافيه شي .. غير احساسي ببعض التعب ! يعني ودي لو اسافر مكان شوي اريح .. واستمتع ..

عاطفياً ..

لا بأس مازالت الأمور ماشيه وكل شي اوكي من ناحية تقبلي - لوحدتي - .. وأعتقد وحدتي تقبلتني .. لين صرنا نفكر نكون حبايب..

ما انكر اني ابحث عن الشخص المناسب .. ولكن بصراحه البرود .. لا زال موجود .. جمود مشاعر رهيب بدا يغطي قلبي ..

وأخاف .. فعلا أخاف افقد حسي في الحب يوم من الأيام..

/

من هالناحية كانت بعض المواقف في حياتي غريبه .. بعد انفصالي عن حبيبتي بشكل كلي ورسمي..

يمكن انه بحاجه لاشخاص يكونون بحياتي القصد ماتكون حياتي خاليه ..

ولكن اعاني من مشكله في تقبل بعض الاشخاص او يمكن لانهم بدو يتقربون مني بطريقه او اسلوب مايعجبني..

مرات افكر هل معقوله تجربتي مع حبيبتي خلتني افقد الثقه بالناس!..

هل لانها كانت تجذب وتألف قصص .. بديت احس العالم نفسها ..

مادري ..

احاول ألهى .. رغم علمي بأن بعض العذاب مكبوت في صدري ..

وأحاول أبقى .. أنسانه نقية قلباً وقالباً ..

أحاول أقوى .. وأصمد ..أمام كل العقبات والمواجع..

الفقدان .. لاي شي تحبه .. شعور موجع

مابالكم .. اذا كنت اشعر بفقدان .. لشيء يكملني .. لنص قلب..

ولكن رغم هذا كله .. الأمل لازال باقي .. وربما هو الفائض بين كل باقي المشاعر..

والحياه لازالت بشكل جيد .. وحتى بنبض .. نـص قلب..

ولازلت أنتظر أياماً جميله .. أفضل من التي دمرتني ..

أستودعكم الله ، تصبحون على خير

نص قلب .. بس !



السلام عليكم ورحمة الله وبركاته..

شخباركم.. في البدايه حبيت أخبركم اني بـ " نص قلب بكون بينكم هني " واتمنى اكون شخص خفيف عليكم ..

وبصراحه بعد تفكير عميق - معمق .. للأبد ‘ لقيت مافيه اي مانع ولا موانع اني اعبر عن شعوري ..

اممم انه انسانه جداً عادية وبسيطه.. عمري 21 سنه .

طالبة مكافحه من الدرجة الصفر " قبل الأولى " , ادرس حاليآ في تخصصين مختلفين"

 ماركتنغ في معهد استرالي + بزنس في الجامعه "

ببساطة : - مايفرق معاي ولاشي اللي بيحب ‘ اللي بيخون  ‘ اللي بيجذب < اعتقد أنها أمثله جداً عاديه ..

الحمدلله عندي مناعه قويه وماعدت أحس بالألم.. خمس سنين خبرة في نزف الجروح .. وهدم الصروح ..

الخيانه بالنسبه لي شي عادي من حبيب , لأن ناس هالزمن ‘ صارو يخونون في كل دقيقه وثانيه و البعض منهم /صار يحتاج هالشي مثل حاجته للماي..

ببساطة : يقولون اني انسانه متهوره ‘ و خصوصا في سياقتي..

ببساطة : أنا أحب اللون الأبيض..

ببساطة : ماقدر أكل بدون ليمون..

وأعشق قطوتي (م) المسلوبه , وأشتاق لقلبها ‘ أكثر من أي شي ثاني

ببساطة : انا من عشاق أم كلثوم / فيروز / عبدالحليم حافظ..

ببساطـة أحيان / إذا عشت أزمه نفسيه أدخن! ..ليش مادري!

//

مبادئ حياتي ..

لا أسمع .. لا أرى .. ولا أتكلم << بس اذا طفح الكيل .. يصير اصرخ!

سو خير وقطـه بحر << عادي احب أعامل الناس بنيتي .. مايهمني شنو اهما دام ضميري مرتاح.. ولا انتظر مردود

طنش تعش تنتعش << اكيد مفهومه ..!

*

ببساطة ودي أكون مكانــه ..

ماطـول عليكم / اتمنى خذيتو نبذه بسيطه p; عني

وتصبحون على خير ..