مساء البرد والموكا الحاره

مساء البرد و الموكا الحاره..

مساكم الله بالخير والصحه والعافيه ..

شلونكم..

* _ * كنت منزله بوست جريب بداية 2011 .. وكنت اتمنى كل الاوضاع تكون بخير..

ولكن دام هذي بدايتها يا 2011 .. لاتزودينها .. احنا ندري انها خاربه خاربه ..

بس والله عقلنا مخروب من أول , لاتخربينه زياده ..

عموماً .. انه مازلت اتمنى ان كل اللي يصير شدة وتزول ويعم الاستقرار على الدول العربيه الشقيقه .,

ولو أني مع الشعب في مطالبة حقوقهم .. ولكن اتمنى اوضاعهم تستقر ولا يعيشون الشتات ..

مثل العراق ..

//

انه فتحت هالمدونه .. عشان اشارككم افكاري ولكن هدفي الأول والأخير , هو اني اكتب كل شي بدون حواجز ..

بدون محد يقولي لين هني وخلاص ماتقدرين تكملين ..

يومي كان يوم عادي , ولكنه غبي ..

في دوامي وفي الكلاس بالذات وانه مجابله مدرسه غبيه ! .. " سميتها زعفرانه "

وصلني مسج .. وفتحته .,

كان مكتوب فيه تاريخ!..

وتعرفون تاريخ شنو! .. تاريخ اول يوم تعرفنا فيه على بعض!

ماجذب قعدت اطالع التلفون وايد ., وزميلي كان يشوفني مستغرب ..

واحسه يقول شفيها هذي قلبت مره وحده ,..

من جم يوم اهوا قايلي انه عمري ماشفت وحده

شايته الدنيا جوتي قدج .. ضحكت وقلت له انه ماحب اعور راسي.. وهذا الشي الصجي

بس مرات تختلف المواقف , واصير احب أعور قلبي؟

والدليل اني تاملت في هالمسج .. يمكن خمس دقايق

وكنت اقول في نفسي! ... هذي شفيها للحين تذكر...!

يعني لهالدرجه عندها أمل نرجع؟ او لهالدرجه ممكن تحبني..

بس في النهايه رجعت الشريط السريع " المؤلم "

وقلت هذا مسلسل يديد راح تبدأ احداثه بعد بكره..

وبنشوف هالحبيبه الولهانه , شناويه عليه

" شكلها لها قلب مايتعب " وخلصو حبلينها اللي تلعب عليهم..

ورجعت تبي حبل يديد ..

الله يهديها ..

خلونا منها ..

//

عن أيامي اللي راحت :

أمس طلعت طلعه مميزه مع وحده غاليه علي ,..

 ضحكنا مع بعض واستهبلنا

وكتبنا عالبحر .. وبردنا ويا بعض " الهوا كان لذيذ "

وعضيتها بعد هههههههه مادري ليش حارتني ..

اممم .. وهمن من جم يوم كنت مع دكتوري بالجامعه وقام يحلل شخصيتي!

وبدأ بالتحليل اول ماحط عينه بعيني وصديت!

قالي .. انتي حزينه ..

ابتسمت قلت اشفيني ؟. لا تتخيل

ولكن اعتقد ان ضحكتي خانتني هالمره . . وبدت تذبل على شفاهي

وصديت

ويوم شفته مطول في ابتسامته وكأنه يقولي " ماتقدرين تخشين هالشي"

قلت له وبعد شنو فيني ..

قالي انتي تبينين من برآ انج قويه ومن داخلج " دا انتي غلبانه "

ضحكت .. قالي انتي مو خبيثه  وطيبه اوي اوي ..

باختصار مدح فيني لين شبعت ..

بس قالي دا انتي مش سهله و مش يا بخته اللي بيحبك!

قلت ها؟ هههههه وانه اضحك قالي يا بخت اللي بتحبيه!

دا انتي تأديه عمرك!

قلت في قلبي ابشرك يا دكتور كل اللي احبهم ...

"يروحون " ...

وبيظلون يروحون ""

اسعدني شي واحد " راح تكونين ذات شأن عظيم "

وابتسمت ابتسامه رضا عن نفسي .. لاني انشالله راح اصير مثل ما ابي ...

وقلبن توكل على الله ..ربي مايخذله...

وفعلا حلو الأنسان يكون راضي عن نفسه شعور لذيذ ..

وشعور لذيذ الانسان يعرف قدر نفسه " وهذا شي انه اكرره دايماً .."

والحمدلله تمر الأيام ونفسيا اكون افضل..

وطبعا الفضل لله .. ولوجودكم بعد ..

ولوجود الأحلام والأماني اللي تلعب دور في حياتنا ..

تعتقدون لولا إيماننا بقدراتنا , وإيماننا بأنفسنا وثقتنا الكبيره في ان احنا نقدر نحقق أهدافنا ..

راح نتجاوز هالعوائق اللي تصيدنا ..

كلنا نمر في ظروف ويتفاوت سؤوها .. ولكننا لازلنا بخير ولا زلنا نقدر نعيش ولا زلنا اقوياء..

ولا زلنا نتنفس هواء مجان .. ولا زلنا احسن من غيرنا بوايد

واذا اللي جرحونا يقدرون يعيشون وضميرهم بعده ماصحصح؟

ترى احنا عايشين واحنا مظلومين ..واقوياء واحنا مجروحين ..وضميرنا مصحصح ولا بيحس بالذنب يوم من الأيام

هذي اكبر نعمة من رب العالمين ..

//

ملاحظه :

انه مشتاقه لأصدقائي وايد .. أصدقائي الالكترونين ..

فعلاً ودي اعرف اخبارهم وانه اتأسف وايد ..على انشغالي ..

بس دايمآ على البال وودي اعرف تفاصيل حياتهم واتمنى هم يتذكروني بعد ويتذكرون اني بكون موجوده اي وقت يبوني فيه..

في النهاية " تصبحون على خير "

 : ) أحبكم